Претставници на Арсенал потврдија дека постигнале договор со Барселона за премин на Тјери Анри во шпанскиот клуб. Договорот предвидува, доколку Анри ги помине лекарските прегледи, Арсенал да добие 16 милиони фунти (23,78 милиони евра) обештетување.
Анри веќе објави дека сака да ја напушти Англија и да премине во Барселона. Доколку целиот процес успешно заврши, тој во новиот клуб ќе има неделна плата од околу 193.000 евра.
„Морам во понеделник да ги поминам лекарските прегледи но, да - се одлучив за Барселона“, изјави Анри за францускиот спортски весник „Л'екип“.
Анри професионалната фудбалска кариера ја започна во Монако во 1994-та година, под водство на сегашниот менаџер на Арсенал, Венгер.
Во 1998-ма година беше дел од француската репрезентација што ја освои титулата светски првак и истата година премина во Јувентус, што се смета за негов најлош период во играњето.
По преминот во Арсенал се разви во еден од најдобрите светски фудбалери и освои две титули во Премиер лигата, три ФА купа и по еднаш играше во финалето на Лигата на шампионите и Купот на УЕФА.
